石頭記(1)

星期一晚約8時，在家坐在櫈上準備吃晚餐時，左後背腰突然劇痛，痛到郁唔到嗰隻。維持了約十分鐘，情況沒有改善，忍痛行入房內，趴在床上，感覺好些，但一轉身，仍是超痛，15分鐘過去，痛楚未減，在床上諗住叫老婆call白車，但叫了幾聲，她因在廚房，我亦不能太用力叫，因一用力更痛，結果又忍痛行出房，坐回櫈上，叫她call白車。

到急症室後，我只能躺在床上，老婆問護士，幾時可見醫生，護士說，要排隊，出面都有好多人等緊，我剛入嚟，係最後一個。過了一陣，老婆見我痛到面容扭曲，再問護士甚麽時間可見醫生，護士有些不耐煩，說，要等出面嗰d見先。

過往自己感冒頭痛等，嘔一次就會好好多，所以有時唔舒服，我會扣喉，令自己可嘔下。我諗，會否是感冒菌入了甚麼位置，令我咁痛呢？所以叫老婆問護士攞個嘔吐袋嘔下，護士問為甚麼要攞嘔吐袋，老婆解釋我扣喉會好嘅理論，護士聽完，說，扣喉？唔好攪d咁嘅嘢。結果沒有比嘔吐袋。過了一陣，我叫老婆再問另一護士，這次成功。我開始瞓在床上扣喉，嘔了兩三次，換了兩三個嘔吐袋，痛楚未減，但可能扣喉時我劏豬咁聲，好快就有醫生來看我，好快打了支消炎止痛針，好快又安排到照腰部。睇嚟扣喉真係幫到手。

打了消炎止痛針半小時後，已減輕不少痛楚，但我仍要躺在床上。到照片出了結果，見醫生時，都是老婆去見。她回來說，醫生說應是腎石，不用留醫，等一下會給我寫病假紙，開藥，並寫轉介信睇專科。在收到轉介信後，我見信上驗查內容說沒發現腎石，老婆說醫生話應是，可能細粒照唔到。醫生開了一星期的藥，4日病假，而消炎止痛藥應是強力的，因胃藥都開了兩隻。當晚12時多離開醫院，回到家已是零晨12時半。