DNA(33) - 大房生活(4)

5點晚餐時間同樣是在房門口叫病人名字，病人行出取餐後回床開餐。晚餐是豐富一些的，肉方面有時有兩三隻雞槌，水果好似間中有一隻橙或一隻蘋果。出院前瘦了十多磅，出院正常食嘢後約一個月已回升十多甚至二十磅。曾經諗過，其實減肥很簡單，跟返d醫院餐食就可好快瘦下來，但實際又真係一d都唔簡單。出院後如仍維持咁嘅食物及食量，其實幾無人生樂趣，除瘦身外，副作用可能係好快又抑鬱。在醫院食呢d餐反而唔會有抑鬱副作用，因入得院嘅人本身已抑鬱，可對副作用免疫，剩低嘅就係瘦身了。

晚餐後約6點可分批沖涼，印象中沖涼房有六隔，一層樓有三四間房再加幾間獨立房，總共就三四十人分批進行。房內有兩名工作人員睇住，雖然每間沖涼格都有門，但門不是封頂，亦不是封底，而在沖涼房外放了一堆醫院的衫褲及冬天用的外套，在入沖涼房前可各取一件，早沖的可選上較合適的尺村，較新淨型仔d嘅"套裝"，遲沖的就有機會是不合身，或殘舊一些的“舊款”了。頭幾次沖涼，其實不單是頭幾次，而是每次，都感到好像入了集中營，甚麼個人私穩或個人尊嚴，通通都要放下，是很好學習謙卑的場所。當然，你唔想學習謙卑，你可選擇唔沖，亦可選擇唔換衫，但唔沖一次，沒有甚麼人會注意，但唔沖多次，難免被人發現，醫護都會留意病人的起居飲食，甚至沖涼大便，唔沖涼洗頭，是否欠缺自理能力，還是有甚麼情緒上的困擾。聽過一醫護說，個人乾淨企理d，醫生見你精神醒目，出院機會都會大d。而有關大解，有一病友說，如去不了廁所(大解），毒素累積，對身體有害。但在醫院的生活，不知是食物，還是因情緒，又真是很難有廁所去的。每天或隔天，醫護都會在房門口問當天有誰是有大解的，並作出記錄。那個經歷過離婚破產的後生仔，我明明見他整天睡在床上，但每次醫護問時，他都表示有去廁所，有次醫護離去後，我問那後生仔，你有去廁所咩？他笑笑口說，有呀。佢話如果你連續幾天都話無，醫護就會用d方法“幫肋”你，確保你有入有出，身體健康。