石頭記(2)

吃藥的第二天，後腰背仍冤痛，不知是否強力止痛藥的副件用，頭亦開始痛，用醫健通預約了秘尿專科，應該說是遞了申請表，未知幾時有得睇，要再等通知，過往經驗，政府專科一般等兩年。這兩天剛好有弟兄姊妹提及往港大深圳醫院檢查，中午時我透過手機app check日子，最快當天下午2時至2時半秘尿專科有期，￥100掛號費。吃過午飯後，2時半到達港大深圳醫院，約10分鐘已到我見醫生。

我用半咸淡的港普(港式普通話)將我的痛楚、急症室的診斷、這兩天的狀況，陸陸續續向醫生講了五六分鐘，醫生聽完後，用廣東話問我，現在覺得怎樣？我覺得醫生其實可以早d叫我用廣東話講，唔使我用港普咁騎喱。我對醫生說，我覺得都仲係冤痛。長話短說，結果我叫醫生幫我做CT scan，做完唔使30分鐘，可自行掃條碼打印了CT scan嘅底片，再攞比醫生睇，醫生亦不用看我的底片，底片已在他的電腦，他指出我左邊輸尿管有腎石，右邊腎都有，因在輸尿管，所以引至左邊痛，石唔大，可先試食藥處理，每日一粒，食3星期，唔得先至做微創，亦開了塞肛的止痛藥，有需要才用，沒有胃藥。埋單CT scan ¥1100，3星期藥就只是￥33.35。

當晚就吃了一粒港深醫院嘅藥，有些累，一早瞓咗覺，第二朝起身感覺好返唔少，嗰粒藥有料到。第二日不知是否因郁動多，有些時候仍有些冤痛，用了一次港深醫院的止痛藥，到第三天病假完結，起身時覺得已可返工，亦不用吃止痛藥。到現在一星期過去，係有少少要就住下，基本上正常生活。

回顧事件都有很多感恩地方，後腰痛的突然出現，不知是否因我在痛之前，在家地板瑜珈墊上用健身球壓背脊引起，但無論如何，算是早發現，可早處理；當然我無心劏豬咁聲令我可早見醫生亦是恩典；上到港深醫院，食到嗰粒藥亦是感恩；能夠經歷腎石呢件事，都算是一特別經歷。

早兩晚我問老婆，咩年紀嘅人會生腎石呢？係咪應該年紀大d先會呢？她睇住韓劇，頭也不回說：你估你年紀仲細呀？一句到尾，發人深省...