仔

阿仔有參加教會大專團契職員會，昨天從弟兄姊妹口中得知，早前在我病患期間，阿仔在團契中表現非常不在狀態，情況令傳道人及其他職員都擔心，但在那期間，當他回到家中時，媽咪卻沒看出他有甚麼不妥，應是他不想令媽咪擔心，固刻意表現正常。

現在自己雖已走出陰霾一段時間，但昨天聽到阿仔當時的表現，仍令自己動容，知他是十分關心父母的。

今天是阿仔畢業後第一天上班，昨天晚上我與玉萍分別為他禱告，願主施恩，繼續帶領他前面的每一步。

台灣遊 (Day 4 & 5)

 

回港了！5天行程，十分愉快。

台灣遊 (Day 3 & 4)

 

台灣第三天去了宜蘭的羅東，到旅館安頓後在巴士站等車時，我們正猶疑是去“羅東運動公園”還是“梅花湖公園”，一熱心大叔見我們頭望望，問我們去邊，我們答往梅花湖公園，他說啱喇，跟佢上車就對喇。未上車前呀大叔都好健談，玉萍是福建人又同佢講咗幾句福建話，大叔話佢在台灣住咗好耐，佢已是第七代後人之類，又話去到梅花湖公園，要行上一座小山，可以睇到全個湖景，又睇到整個羅東，仲話我哋嚟旅行係要慢活。

落車後，大叔在去路邊檢了一塊紅磚碎石，在地上畫起地圖，再一次解說由我們落車地點，行去小山的路徑。見到分叉路唔好行，見到廟再拐個灣，再見到分叉路又唔好行，又再拐個灣；落山時唔好行原路，行獨木橋，會去到湖中一小島，問我們是否清楚。我望住佢畫得好清，得幾條線條但唔係好清楚嘅地圖，又望望佢好誠懇嘅面容，即時回答：清楚。佢話清楚就好。最後我們邀請他一起拍照，佢他亦好主動高興地舉起V字手勢，彼此都覺是愉快的相遇。

今天午餐第一次去了吃麻辣自助火煱、在梅花湖公園踩單、逛了羅東夜市，買了鹽水雞、柯仔煎、台灣啤酒回旅館當宵夜，阿仔話我生日要買生日蛋糕，又教我們玩了鬥地主。臨近黃昏時收到話因颱風逼近，台北地區星期四停班停課，但我們在羅東天氣唔錯，係有d 風，仲涼爽，看明天如何吧。

台灣遊 (Day 2)

鼎泰豐果然並非浪得虛名，每樣都好精緻亦好味，埋單2千5台幣，算抵食。餸菜都是洪琛點的，三個主食+六個小吃+一甜點。個甜點都是小籠包款，但朱古力饀，阿仔食咗一隻就話唔慣，兩老各自吃兩隻，都ok好味嘅。在台灣第二日，去了九份、貓村、十分、鼎泰豐加埋行饒河街觀光夜市，算大滿足。明天第3day去宜蘭。天氣唔錯，只間中一兩陣細雨，應可踩單車。

台灣遊 (Day 1)

上次嚟台北已是多年前嘅事，當時阿仔仲細。今次嚟好多行程都交比阿仔安排，相片中不同的食點，都是由佢揸fit。昨晚鐵板燒嗰餐佢話由佢比錢，未出發前已比定一千蚊阿媽，話食豪d，原本去鼎泰豐，但太多人要等成30個籌，即時改了間叫大埔嘅鐵板燒，算是阿仔第一次自掏腰包請我食嘅生日飯，都要成2000蚊...台幣，即約5百蚊港紙，已經又和牛又帶子又蝦又啤酒等等，我都未試食呢類坐在枱邊睇住佢煮嘅鐵板燒，好味又有風味。今日會再闖鼎泰豐，食埋阿仔嗰5百蚊。